Ushtrimi 2

Prania e Hyjit

Ia përkujtoj vetes se Zoti më mbron me dashurinë e tij të pamasë.

Shpirti Shenjt

E lus Shpirtin Shent që të lutet në mua gjatë kohës së këtij meditimi dhe lutjeje.

Hiri për të cilin lus

Lus që Zoti të më tregojë çka dëshiron të më thotë personalisht gjatë meditimit për Gjon Pagëzuesin.

Shkrimi i shenjtë

Luka 3,15-18

¹⁵ E pasi populli priste me shpresë dhe pasi të gjithë mendonin në zemrat e veta për Gjonin: a mos është pikërisht ky Mesia, ¹⁶ këndej Gjoni mori fjalën e u tha të gjithëve:

“Unë, vërtet, po ju pagëzoj me ujë, por po vjen një më i fortë se unë, të cilit unë nuk jam i denjë as t’ia zgjidh lidhëset e sandaleve të tij. Ai do t’ju pagëzojë me Shpirt Shenjt e me zjarr. ¹⁷ Ai e mban në dorën e vet terploten për të pastruar lëmin e vet, për të mbledhur grurin në grunarin e vet, kurse bykun do ta djegë në zjarr të pafikshëm.”

¹⁸ E me shumë mësime të tjera ia shpallte popullit Ungjillin.

Pikat për lutje

Çfarë mase e larmishme që vjen te Gjon Pagëzuesi: tagrambledhës, ushtarë dhe shumë të tjerë; fjalimi i tij ndërlidhet me një rreth të gjerë njerëzish. Po ndodhte diçka e jashtëzakonshme – përnjëmend një personazh karizmatik.

Ju flet që të jenë të drejtë, që të bëjnë drejtësi dhe t`i respektojnë të drejtat e të tjerëve. I jep zemër popullit që ta ndajë ushqimin dhe veshmbathjen me të tjerët.

Ndër njerëz ndjehet një pritshmëri. Dramën e hasim në rreshtat e ungjillit. E pyesin veten a mos është Gjoni Mesia i shumëpritur. A? Njerëzit pyesin për identitetin e tij të vërtetë.

E pra, Gjoni nuk bën lojëra. Ai e di mirë se është duke e përgatitur rrugën për një më të madh se ai, që do të pagëzojë me Shpirtin Shenjt dhe me zjarr. Ai nuk është i denjë t`ia zgjidh të mbathurat e këmbës.

Gjoni i fliste masës edhe për shumë gjëra tjera. A mund ta paramendojmë çka ju ka thënë? Na është thënë se shpallte Lajmin e gëzueshëm. Ndoshta pak do të na çudisë veshja e tij e pazakontë, të ushqyerit e tij të çuditshëm dhe jeta në shkretëtirë. Mirëpo, tek ai shkonin shumë vetë. Hyji ka folur me anë të tij para aq shumë vitesh. Çka më flet mua Hyji me anë të Gjonit në këtë kohë të Ardhjes?

Meditimi

»Gjoni me këngë e paralajmëroi ardhjen dhe e tregoi të pranishëm“ (nga Lutja eukaristike e Ardhjes). Si mund të na ndihmojë meditimi për Gjonin që të jemi të gatshëm për ardhjen e Krishtit në zemrat tona këtë Krishtlindje? Në zemrën time udhëtoj në Palestinë, në shekullin e I-rë. Ndodhem ndër tagrambledhës, ushtarë dhe masën e popullit. Provoj me syrin e imagjinatës ta shoh Gjonin. Si duket? Si tingëllon? E përgjoj fjalën e tij dhe e dëgjoj se si flet që duhet t`i ndajmë rrobat dhe të jemi të drejtë. A gjejnë jehon këto fjalë në botën bashkëkohore?

E dëgjoj se si flet për Krishtin. E vërej çuditjen dhe respektin e thellë. Mahnit modestia e tij. Te ai gjejmë një përvujtëri të shëndosh dhe të plotë. A nuk është kjo një freski? Gjoni e ndjen veten krejt mirë dhe nuk ka nevojë të shtiret dhe të ndreqet para masës së njerëzve.

Lutja

O Zot i dashur, Gjon Pagëzuesi po më mahnit. Përnjëmend ai është një person më i ndryshëm. Me shumë qejf ia lëshon vendin e parë kushëririt të tij dhe fare nuk është xheloz. Kujdeset për ata që nuk kanë ç`të hanë as ç`të veshin. Ma mbush zemrën time me flakë për drejtësi dhe dhembshuri për ata që vuajnë. Mirësia e thjeshtë që e shoh në Gjonin të jetë nxitje për mua në jetën time dhe të më ndihmojë që t`i njoh mënyrat me të cilat Krishti është i pranishëm në ditën dhe vendin tonë.

Këtë po të lus nëpër të njëjtin Krisht Zotin tonë. Amen.

Reflektimi

-         Si kaloi lutja?

-         A më ka nxitur gjë për të menduar?

-         A ekziston një pjesë e veçantë e lutjes ku do të dëshiroja më gjatë të qëndroj?

Ushtrimi 1

Prania e Hyjit

Ia përkujtoj vetes se Hyji më mbron në dashurinë e tij të pamasë.

Shpirti Shenjt

E lus Shpirtin Shent që të lutet në mua gjatë kohës së këtij meditimi dhe lutjeje.

Hiri për të cilin lus

Lus për hirin e shenjtë që të dëgjoj sesi Zoti do të dëshironte që të qëndroj zgjuar dhe të lus në këtë fazë të udhëtimit tim të jetës.

Shkrimi i shenjtë

Luka 21,34-36

³⁴ “Kini kujdes veten që zemrat tuaja të mos kalamenden prej grykësisë, prej shfrenisë e prej kujdeseve të jetës që ajo Ditë të mos ju vijë papritmas, ³⁵ sepse ajo ditë do të vijë porsi kurth mbi të gjithë banorët e tokës mbarë. ³⁶ Prandaj, rrini zgjuar e lutuni në çdo moment që të mund t’u shpëtoni të gjitha këtyre që do të ndodhin e të mund të qëndroni para Birit të njeriut.”

Pikat për lutje

Fjalët e Jezusit janë fjalë mirëdashjeje, këshille miqësore. Mësuesi i mirë në shkollë na jep zemër që ta përsërisim lëndën dhe të përgatitemi për provim. Na tërheq vërejtjen për rreziqet e kohës së humbur. Zoti na flet që ta shikojmë pasqyrën e gjerë të jetës – planin e Hyjit për mbarë botën. Hyji nuk e mbyt harenë tonë: mund të kënaqemi në sport, teatër dhe aktivitete të tjera, mirëpo na nxit për një sjellje të përgjegjshme. Jemi të thirrur që të jetojmë një jetë nga qendra e qenies sonë, dhe jo vetëm sipërfaqësisht, që përnjëmend është lajm i gëzueshëm.

Nuk mund të jemi të gatshëm dhe pavarësisht t`i përgjigjemi ardhjes së Hyjit. Kemi nevojë për forcën e Hyjit dhe për këtë arsye lusim, kërkojmë fuqi për të cilën kemi nevojë. Jezu Krishti do të kthehet me lavdi, por nuk e dimë kur; duhet qenë të gatshëm ta presim kur të vijë nëpërmjet njerëzve dhe ngjarjeve të jetës së përditshme. Është mirë që gjithmonë të jemi të gatshëm në jetë! A je dakord?

Meditimi

Predikimi që e kam dëgjuar para disa viteve në të dielën I-rë të Ardhjes po më kujtohet çdo vit. Predikuesi na jepte zemër që të shkojmë në një shetitje të gjatë pranë detit, lumit apo kodrës që ndodhej në hyrje të qytetit. Qëllimi i tij ishte që të shkojmë në jetën tonë sesi është ajo tani. Si jam duke jetuar? A jam i lumtur? A ekziston diçka që do ta ndryshoja në jetë? Çfarë është raporti im ndaj Hyjit? A duhet ta ripërtërijë? Të gjej kohë më shumë? Çfarë është raporti im ndaj familjes dhe miqve? A ekziston diçka me çka do të vazhdoja kështu sepse më ndihmon? A ekzistojnë fusha në të cilat ndryshimi do të ishte i shëndoshë dhe i domosdoshëm? Ç`po ngjet me punën? A është krejt në rregull? Apo, a ekzistojnë konfliktet? Ndoshta jam i brengosur për ardhmërinë?

I mbështjellë në mantelin e ngrohtë ulem dhe bisedoj me Hyjin për jetën time. Nuk dëshiroj që këtë bisedë „ta kaloj shpejt e shpjet“. I flas nga thellësia e zemrës duke ndarë me të gëzimet dhe pikëllimet, shpresat dhe frikën. Lus prej tij ndihmë dhe fuqi.

O Zot Jezu, fjalët tua nga Shkrimi Shenjt më nxisin që ta ngadalësoj hapin dhe të marr guxim të shikoj më thellë dhe më seriozisht jetën time personale. Kërkon prej meje jo që të ma prishësh disponimin, por të jetoj jetën në plotësi. Më ndihmo që ta dëgjoj thirrjen tënde dhe t`i përgjigjem asaj me shpresë në zemër, duke ditur që më çon drejt gëzimit të vërtetë dhe paqes së vërtetë. Amen.

Reflektimi i lutjes

• Si kaluan meditimi dhe lutja?
• Në cilën mënyrë jam ndjerë i prekur gjatë kohës kur kam lutë?
• Po të meditoja dhe lusja sërishmi mbi këtë pasazh, cilës fjalë apo shprehje do t`i kthehesha?

Ripërtëritja shpirtërore apo ushtrimet shpirtërore janë si pushim i vogël vjetor që e kalon me Zotin. Dëshiron ta kalosh kohën me të duke e dëgjuar çka të flet Hyji në jetë në këtë kohë të Ardhjes. Qofsh bekuar kur të tërhiqesh në heshtje dhe të presësh ç` dëshiron të ndajë Hyji me ty.

Tërhiqu në vende të vetmuara. Provo „të ikësh“ nga përditshmëria dhe gjithë ajo që e ke të afërme. Shko në ndonjë vend tjetër. Gjej një hapësirë të përshtatshme, mbylle mobitelin. Posta elektronike mund të presë dy-tri ditë. Çka thua? Megjithatë, ti do të dish ç`është më e mira për ty në rrethanat në të cilat jeton.

Propozime

Të gjitha ato që t`i ofroj janë vetëm propozime. Shpirti Shenjt është udhëheqësi kryesor. Me udhëheqjen e Shpirtit Shenjt shfrytëzoji edhe propozimet, mirëpo nëse mendon se nuk ke nevojë për to, atëherë lëri. E di mirë që do ta provosh Hyjin se si „po vizaton dhe shkruan“ nëpër zemrën tënde. Hyji shpesh herë na befason kështu që varet prej tij se si do të befasojë edhe ty.

Si do të duket dita. Këtë mund ta bësh në një ditë apo gjatë tri ditëve. Mirë është t`i planifikosh të gjitha gjërat paraprakisht. Po t`i ofroj tri reflektime dhe kohëra për lutje. Të tri kohërat mund t`i shfrytëzosh në një ditë apo çdo ditë nga një reflektim. Këtu po e jap një program njëditor.

Orari i ditës

10.00am Përatitja

10.15am Meditimi i parë - Luka 21,34-36

11. 15am Pauzë

11.45am Meditimi i dytë - Luka 3,10-18

12.45pm Dreka, shetitje e lehtë, pushim

2.30pm Meditimi i tretë - Luka 1,39-45

3.30pm Pauzë: shtriju, relaksohu, ecë pak këmbë!

4.00pm Reflektimi i ditës së kaluar

Përgatitja

Në rendin tënd të ditës gjithësesi fute edhe kohën për pushim dhe gjimnastikën si dhe 10 minutat shtesë për reflksionin pas lutjes (shih Reflektimi).

Po të propozoj tri kohëra për lutje dhe meditim. Është mirë ta caktosh saktë gjatësinë e kohës para se të fillosh me lutje. Mund të vendosësh për 30, 40, 50 apo 60 minuta. Dhe atëherë mbaje vendimin që e ke bërë.

Ardhja

Të gjithë flasin se sa ditë ende kanë mbetur për blerje para Krishtlindjeve. A do t`i dërgoj letër-urimet me kohë? Kjo kohë në vit është me shtrëngesa të mëdha për shumë vetë. Kohë e stresit! Shumë detyrime por pak kohë! Si ithtarë të Jezusit kemi fituar dhuratën e kohës që quhet Ardhja (Adventi). Kjo është një rast që shkurt t`i shmangemi shpjetimit të egër. Ky është një rast i mirë që pak të tërhiqemi dhe ta presim Hyji që vjen. Hyji ka ardhë para dy mijë vjetëve mirëpo vazhdon në mënyrë permanente të vijë në jetën tonë dhe në zemrën tonë këtyre ditëve në muajt nëntor dhe dhjetor. Dëshirojmë të jemi të gatshëm për këtë ardhje. Për këtë arsye edhe e ëbjmë këtë ripërtëritje shpirëtrore.

Ndërsa përgatitemi për lindjen e Jezusit, meditojmë për ata që e kanë pasur një detyrë të caktuar në përgatitjen për ardhjen e tij. Këta janë Gjon Pagëzuesi dhe Maria, nëna e Jezusit. A e ndjej veten të nxitur ndërsa i vështroj jetët e tyre? A na flasin për çiltërinë dhe pranimin e Hyjit që vjen? Tani jam i gatshëm dhe lus Hyjin që ta bekojë ditën e sotshme dhe lutjen dhe meditimet e mia.

S`kam nevojë kurrgjë për të dhënë

S`kam nevojë kurrgjë për të qenë i detyruar

S`kam nevojë kurrgjë për të zotëruar

S`kam nevojë kurrgjë për të zbukuruar

S`kam nevojë kurrgjë për të sjellë

S`kam nevojë kurrgjë për të paraqitur

S`kam nevojë kurrgjë për të bërë

S`kam nevojë kurrgjë për të mundur

S`kam nevojë kurrgjë …

Thjesht të jesh këtu

dhe të jetosh

te ti

në ty

unë

po

(Autori i panjohur)

KËRKIMI I ZOTIT

Vëlla i dashur,

ti dëshiron ta kërkosh Zotin me gjithë

qenien tënde

dhe ta duash me gjithë zemrën tënde.

Por, do të ishte gabim të shpresosh

se mund ta kapësh me dorë.

Duart e tua janë tepër të shkurta,

sytë e tu tepër të dobët,

zemra e jote dhe mendja tepër të vegjël.

Ta kërkosh Zotin

para së gjithash do të thotë

të lejosh që të gjejë Ai ty.

Ai është Hyji i Abrahamit, Izakut e Jakobit.

Ai është Hyji i Jezu Krishtit.

Ai është Hyji yt

jo për arsye se është Ai i yti

por për arsye se ti je i tij.

Ta zgjedhësh Hyjin do të thotë

të jesh i vetëdijshëm për të vërtetën

se Ai të njeh dhe të do

në mënyrën që e tejkalon

gjithë atë që njerëzit

mund të mendojnë për të,

se je i dashur

para se ndokush ka menduar në ty

apo e ka shqiptuar emrin tënd.

Ta zgjedhësh Hyjin do të thotë

në besim ti dorëzohesh.

Ndërtoje jetën tënde në atë besim

si në themel të papashëm.

Lejo që ai besim të të mbart

sikurse nëna

e mbart fëmijën në kraharorin e vet.

E për këtë arsye

mos flit për Zotin për së tepërmi,

por jeto

në bindje se Ai e ka shkruar emrin tënd

në pëllëmbë të dorës së vet.

Kryeje detyrën tënde njerëzore

në sigurinë çliruese

se asgjë në botë nuk mund të të largojë

prej dashurisë së Hyjit që ka për ty.

Në Jezu Krishtin prej Nazaretit

tregon Hyji në mënyrë të veçantë se

si pa u lodhur e kërkon njeriun

dhe se i tëri i është kushtuar

lumturisë së njeriut.

Në Jezu Krishtin prej Nazaretit

tregon Njeriu

si mundemi krejtësisht t`i takojmë Hyjit,

sa liri dhe njerëzi,

sa trimëri dhe vetëmohim

mund të tregojë njeriu

kur ta përjetojë se e ka gjetur Hyji

dhe kur t`i dorëzohet Hyjit krejtësisht.

Në fatin e Tij

edhe për ty është e shënjuar rruga në ardhmëri

nëpër mëkat dhe vdekje

në bashkimin e dashurisë,

në lavdinë e pakalueshme dhe

në jetë.

Me fe do ta njohësh Hyjin tënd

në veprat e duarve të tija,

në rend të parë në njerëz,

në njerëz të krijuar në shëmbëlltyrën

dhe përngjasimin e Hyjit,

dhe mbi të gjitha në dashuri

që është Jezusi.

Po edhe nëse nuk merr prej Tij

kurrfarë shenje të jashtme,

asnjë fjalë të shprehur,

megjithatë do ta njohësh.

Madje edhe "mosprania" e tij

është plot me mister të madhërisë së tij

të pamasë.

Ai mund të të ndihmojë

që të mos shkosh kah veprat e duarve tua

dhe mos t`u shërbesh atyre.

Për këtë arsye mos e humb kurrë guximin,

por edhe më tej kërkoje

në të gjitha sendet,

në të gjithë njerëzit -

të gjithë ata janë garanci

se do ta gjesh më në fund.

Le të merr malli për shikimin e Hyjit

fytyrë më fytyrë.

Si agimi është e sigurt ardhja e tij,

e besueshme si shiu i vonë i vjeshtës.

E nëse qëndron në dashuri,

do të qëndrosh në Hyjin

dhe nuk do të ecësh më në errësirë.

Jeto pra në gëzim dhe shpresë,

pa ndrojtje dhe frikë,

në paqe me vetveten dhe botën,

në nderim të thellë dhe falënderim të përhershëm.

Sepse, mirësia e Hyjit ndaj teje është e amshuar.

(Brakkenstein Community)

 Porosia e Jezusit

Kur flitet për Kërshëndellat mendohet në “kohën e gëzimit” dhe “kohën e mirësisë”. Mirëpo me t`u afruar këto festa njeriu e përjeton se disi është larg nga ky gëzim. Papritmas e ndjen veten të stërngarkuar, menjëherë i biejnë ndër mend shumë gjëra që ndoshta nuk i ka bërë apo që do të duhej t`i bënte.

A jeni të lodhur ndoshta me brengosjet, planifikimet, problemet, vështirësitë që i keni hasur gjatë këtij viti që po e lëmë pas?

A jeni duke i përjetuar Kërshëndellat si një trysni, diçka që po ashtu po jua merr kohën.

Ndaluni një moment!

Ndoshta mendoni se nuk keni kohë të ndaleni, mirëpo përnjëmend do të duhej të ndaleshit.

Dëshiroj që ta ndjeni paqen për këto Kërshëndella.

Në vend që ta pyesni veten si do t`i mbijetoni këto festa, dëshiroj që vërtet të jeni të lumtur. Mirëpo për ta arritur këtë ju duhet të krijoni një hapësirë për të fituar diçka më të mirë.

Ndoshta jeni duke u munduar t`i kaloni këto Kërshëndella më mirë se herave të tjera, dhe çdo moment jeni duke e shfrytëzuar për ta arritur këtë qëllim. Mirëpo kjo herë ju shkon për dore herë jo.

A jeni ndalur ndonjëherë dhe a ju ka shkuar mendja që ta pyesni veten, a janë të gjitha këto të domosdoshme.

Të gjitha këto që po i bëni a janë duke ju bërë përnjëmend më të lumtur, veten dhe të dashurit e tu? Apo ndoshta jeni duke i lëshuar gjërat e rëndësishme në jetë për të zgjedhur dhurata të përsosura, për të bërë dekorime të përsosura dhe të bleni ushqime për dreka apo darka të jashtëzakonshme.

Sa më pak të brengoseni se si t`i bëni Kërshëndellat më të përsosura aq më shumë do të keni kohë që t`i shijoni ato.

Sa më pak stres dhe tendosje, aq më shumë do ta përshkojë lumturia dhe gëzimi kohën që do ta kaloni me të afërmit tuaj.

Kërshëndellat më së miri i përjetojmë kur vëmendja jonë është e drejtuar kah dashuria si gjëja kryesore.

Dashuria është thelbi i Kërshëndellave!

Kërshëndellat do të duhej të ishin festim familjar, kremtim kur e kalojmë kohën me të dashurit tanë, kremtim i dashurisë që ia dhurojmë njëri-tjetrit.

Për fat, dashuria po humb në tollovinë e kësaj feste, me gjëra konsumuese dhe të kalueshme.

Kërshëndellat janë kohë festimi, mirëpo domethënia e saj është më shumë se kaq.

Kërshëndellat janë ditëlindja ime. Kjo është kohë për festimin e dhuratës më të mirë që njerëzimi e ka fituar ndonjëherë.

A mundeni një moment tani të ma kushtoni Mua, në nder të ditëlindjes sime?

A mundeni për Mua ta ndani të paktën një minut, në mënyrë që të mund t`jua them se sa ju dua?

A mundeni të ndaleni që të më falenderoni për dashurinë Time, dhe ta merrni me mend se edhe ju mundeni të dhuroni më shumë dashuri dhe ta përhapni atë nëpër botë?

Dashuria për ju më ka shtyrë të vij ndër ju, në këtë botë para 2000 vjetëve.

Dashuria ime ndaj jush më ka dhënë fuqi që të bëhem njëri prej jush, që të jetoj dhe të vdes për ju.

Dashuria ka qenë, dhe sot e kësaj dite është, thelbi i ekzistimit tim.

Të gjitha veprat e mia nga dashuria për ju personalisht dhe nga dashuria për mbarë njerëzimin.

Aq shumë ju dua!

Për këto Kërshëndella

gjej kohë për dashuri!

Nëse këtë e bëni, do të Ma dhuroni dhuratën më të mirë të mundshme, dhe do të ma jepni rastin për t`ju dhënë diçka të veçantë këtë vit.

Të gjitha kalojnë, por dashuria që e keni ndarë me të tjerët do të qëndrojë përgjithmonë.

Ju dua,

Jezusi

Nëse ende nuk e keni përjetuar dashurinë e mrekullueshme të Jezusit, zemrën dhe shpirtin e Kërshëndellave, këtë mund ta bëni tash. Krejt çfarë duhet është që Jezusin ta thirrni në zemrën tuaj dhe në jetën tuaj.

Mund t`i shpreheni diçka ngjashëm si kjo:

Jezus, të falënderoj për dashurinë që ma ke tregu me ardhjen Tënde në këtë Tokë, duke jetuar dhe vdekur për mua. Dëshiroj t`i kremtoj këto Kërshëndella së bashku me Ty. Dëshiroj me të njohtë, dëshiroj me pranu dashurinë Tënde, dhuratën e jetës së pasosur. Të lutem, preke jetën time me dashurinë Tënde dhe më ndihmo që këtë dashuri ta ndaj me të tjerët.

Për shumë mot Kërshëndellat!

Skena 3

Tregimtari: Të gjithë barinjtë shkojnë vrap te stalla. Secili ka një dhuratë për fëmijën e vogël, vetëm më i vogëli bari nuk ka asgjë.

Bariu 1: Unë të kam pru një filxhan me qumësht!

Bariu 2: Unë të kam pru bukë!

Bariu 3: Unë të kam pru vezë!

Djali me fyell (lodër/vegël muzikore): Unë nuk kam asnjë dhuratë, por po i bie muzikës për ty!

Kënga “...” [e zgjedh një këngë nga dëshira]

Kënga “...” gjendet në doracakun me këngë popullore fetare “I këndojmë Zotit” botuar nga Drita 1999, mirëpo mund të këndohet edhe ndonjë këngë tjetër e përshtatshme për Kirshtlindje!

Bëfshi qejf në shfaqje!

Innsbruck, dhjetor 2008,

(Përktheu dhe përshtati: P. Shtjefën Dodes SJ)