Shenjtërorja e Zojës Bekuar në Lurd

Përshpirtëritë - devocionet në Lurd

Procesioni me qirinj

Procesioni me qirinj bëhet për çdo ditë në ora 21. Ai ka filluar qysh prej vitit 1872. Gjatë tij lutet rruzarja e shenjtë.
Procesioni fillon te shpellëza dhe vijon nëpër shesh deri te bazilika e Zojës Rruzare. Në krye të procesionit mbartet nga shtegtarët truporja e Virgjërës Mari.
Gjatë procesionit pjesëmarrësit e grupeve shkojnë pas flamujve të tyre. Çdonjëri është i thirrur, të mbajë një qiri, për ta përkujtuar pagëzimin e vet.
Pas përfundimit të procesionit priftërinjtë dhe ipeshkvinjtë ndajnë bekimin.
Në lutjen e rruzarës së shenjtë e përkujtojmë jetën e Jezu Krishtit, lindjen dhe fëmijërinë e tij (misteret e gëzimit), jetën e rritur të tij (misteret e dritës), mundimin dhe vdekjen e tij (misteret e mundimit) dhe ringjalljen e tij (misteret e lumturisë). Nëpër këtë përshpirtëri dëshirojmë atë ta njohim më mirë.


Procesioni eukaristik

Prej prillit deri në tetor ky kremtim fillon në orën 17 te podiumi drejt bazilikës Pio X. Procesioni zgjat rreth një ore. Nëse bie shi apo bën mot i keq bëhet adhurimi eukaristik në Bazilikën e Pio-s X-të.
Domethënia e procesionit
Që nga mesjeta procesionet eukaristike dhe adhurimi me të Shenjtërueshmin sakrament janë forma devocioni ndaj Korpit të Krishtit. Ato numërohen ndër traditat më të vjetra të vendshtegtimit të Lurdit, të cilat procesione lidhen me bekimin e të sëmurëve.

Ky kremtim ka domethënie të trefisht:
- Prania e vërtetë e Krishtit në hostie
- Nevoja për ta parë atë, të cilin ne e dojmë
- Biri i Hyjit edhe sot është në mesin tonë, në gëzimet tona dhe në vuajtjet tona.

Rrjedha e procesionit

Disa minuta para orës 17 një diakon e mbart monstrancën me të Shenjtërueshmin sakrament prej tendës së adhurimit deri te podiumi. Shtegtarët mblidhen në këtë vend.
Pas disa minutash fillon procesioni njëherë me të sëmurët dhe handikapatët, pastaj vjen i Shenjtërueshmi sakrament, i rrethuar me “simbole”.
Procesioni shkon drejt bazilikës së Pios X. I Shenjtërueshmi sakrament vendoset përmbi lter. Pastaj bëhet një adhurim që përfundon me bekimin e të sëmurëve.


Meshët internacionale

- Nga e Diela e Larit deri në mes të tetorit kremtohen meshët internacionale zakonisht të mërkurave dhe të dielave në orën 9.30 në bazilikën e Pios X. Zgjatë afër 90 minutash.
- Kush dëshiron të ketë një vend për t`u ulur, duhet të vijë atje një orë përpara.
- Të gjithë, që u pëlqen të këndojnë, mund të këndojnë së bashku në korin e shtegtarëve. Këngëtarët takohen te organotë në orën 8.15. Numri i pjesëmarrësve është i kufizuar.
- Priftërinjtë, që dëshirojnë të bashkëmeshojnë, vijnë më së voni 30 minuta para fillimit me albë dhe stolë në sakristi.
- Grupet, që dëshirojnë të jenë të përshëndetura, lajmërohen në qendrën e informacionit.
- Mesha internacionale rinore kremtohet të shtunave në korrik dhe në gusht në orën 20.30 në kishën e Shën Bernadetës.


Rruzarja e shenjtë

Rruzarja e shenjtë lutet frëngjisht prej prillit deri në tetor në shpellëz dhe prej shtatorit deri në mars në kryptë përditë në ora 15.30.
Rruzarja e shenjtë lutet edhe në gjuhë të tjera, koha e së cilës është e përcaktuar.


Rrëfimi - pajtimi

Sakramenti i pajtimit mund të bëhet në kapelat e rrëfimit.
Koha e rrëfimit në gjuhën përkatëse është e shënuar në njoftimet në hapësirat ku rrëfehet.
Maria në Lurd i kumtoi Bernadetës porosinë e kthimit, kthimit të zemrës. Është me rëndësi të reflektohet jeta jonë gjithnjë në dritën e ungjillit të Jezu Krishtit dhe të peshojmë kur kemi vepruar gabim dhe ku duhet të ndryshohemi. Sjellja jonë e gabuar na shkakton dhimbje dhe na ngarkon. Zoti na liron nga kjo ngarkesë nëpërmjet sakramentit të pajtimit në rrëfimin e shenjtë, kur atij ia pranojmë sjelljen tonë të gabuar me pendim dhe përvujtëri para një prifti të ngarkuar me detyrë nga kisha, të kërkojmë ndjesë nga Zoti, të marrim përsipër përmirësimin dhe të jemi të gatshëm për të bërë sërish vepra të mira me pendesë. Në bisedën e rrëfimit mund të shoshiten prapavijat e gabimeve dhe mashtrimeve. Kjo mund të përparojë një njohje të thellë të vetvetes.


Udha e kryqit

Prej shumë shekujsh janë ngritur njerëzit, për t`a ndjekur rrugën e Jezusit drejt malit të Kalvarit. Në Jerusalem i vendosin 15 stacione (ndalesa), të cilat shenjohen nëpërmjet 15 gurëve të gdhendur. Ato çojnë drejt vorrit të shenjtë dhe te vendi ku Jezusi qe kryqëzuar. Meqenë se jo secili mund të shkojë në Tokën e shenjtë, lindi një zakon në mesjetë, për t`i paraqitur 15 stacionet e udhës së kryqit në kisha apo në natyrë, siç janë këtu në Lurd.
Udha e kryqit në Lurd gjarpëron mbi 1500 metra nëpër një zonë pyjore të përpjetë. Në 15 stacionet janë të vendosura 115 figura prej gize. Udha u vendos në mes viteve 1898 dhe 1911.
Një udhë tjetër e kryqit për të sëmurët ndodhet në vendin e rrafshtë në anën e djatthë të buzëlumit Gava.
Udha e kryqit mund të ndjeket po ashtu nëpër figurat prej qelqi në bazilikën nëntokësore të Pios X.


Udha e ujit

Në anën e djathtë të lumit Gava ekzistojnë 9 stacione të ujit, që mbushen prej ujit të shpellzës. Për çdo stacion ekziston një citat biblik, që i referohet një emri të Zojës së Bekuar:
1. Beersheba, Zan 21, 25-34 (Zoja jonë e dashur e besëlidhjes)
2. Në rrugën për në Gaza: Veprat e apostujve 8, 26-40 (Nëna jonë e dashur e Këshillit të mirë)
3. Meriba, Ekz 17, 1-7 (Zoja jonë e dashur e pendesës)
4. En-Gedi, Hld 1, 13-14 (Zoja jonë e dashur e gëzimit)
5. Gurra e tempullit: Gjoni 7, 37-39 (Mbretëresha e apostujve)
6. Nazareti, Lk 2, 51-52 (Zoja jonë e dashur e lumturimit)
7. Pusi i Jakobit, Gjn 4, 1-26 (Zoja jonë e dashur e ujit të gjallë)
8. Betesda, Gjn 5, 1-18 (Zoja jonë e dashur e shërimit)
9. Shiloah, Gjn 9, 1-41 (Zoja jonë e dashur e dritës)

Grupet si dhe persona veç e veç mund të përshkojnë këtë rrugë, të ndalen prej stacioni në stacion, të lexojnë nga Bibla, të pijnë ujë dhe me të të lahen.
Udha është e hapur çdo ditë prej orës 6 deri në ora 24.


Udha e re e kryqit e të sëmurëve

Në vitin 2001 vendosi Mons. Jacques Perrier, ipeshkvi i Tarbes dhe Lurdit, bërjen e një udhe të re të kryqit, e cila do të ishte e qasshme për shtegtarë me aftësi/lëvizje të kufizuara. Falë një direktori të vendshtegtimit belg e takon ipeshkvi Perrier artisten Maria de Faykod, të cilën e ngarkoi me detyrë ta realizojë dalëngadalë këtë udhë të re të kryqit për shenjtëroren. Shpenzimet për të gjitha stacionet i morën mbi vete dhuruesit zemërgjerë. Udha e kryqit do të përfundojë me rastin e jubileut - 150 vjetorit të dëftimit të Zojës, këtë vit - 2008. Financimi i trajtimit të peisazhit ende nuk është mbuluar.


Orari i hyrjes së lirë në rrethin e shenjtërores

Hyrjet kryesore në vendin e shenjtërores janë të hapur prej orës 5 deri në mesnatë. Gjithmonë është e hapur hyrja për rrugën gjarpëruese mbi bazilikën e sipërme.